افغانستان اسلام امیرلیگی ریاست الوزراء سیاسي اورین باسری حرمتلی مولوی عبدالکبیر بوگون ایرانگه رسمی سفری چاغیده اوشبو مملکت ایچکی ایشلر وزیری احمد وحیدی بیلن اوچره‌شدی.
اوچره‌شووده ایکّی تامانله‌مه مناسبتلرنی مستحکملش، ایرانده‌گی افغان قاچقینلری نینگ معمالرینی حل ایتیش و چیگره‌ده مخدر مادّه‌لر قاچاقی نینگ آلدینی آلیش مسأله‌لری اطرافلیچه بحث قیلینه‌دی.
جناب وحیدی افغانستان اسلام امیرلیگی سیاسی اورین باسری نینگ ایرانگه تشریفیدن ممنونلیگینی اظهار ایتدی. ایران ایچکی ایشلر وزیری افغانستان و ایران یوقاری درجه‌لی رسميلری نینگ تشریفلری علاقه‌لر و همکارلیکنی رواجلنتیریشده ثمره‌لی ایکنلیگینی تاکیدلب، تهران اسلام امیرلیگی بیلن تورلی ساحه‌لرده علاقه‌لرنی رواجلنتیریشدن منفعتدار ایکنینی قوشیمچه قیلدی.
جناب وحیدی نینگ سوزلریگه کوره، افغانستانده‌گی خوفسیزلیک بیلن باغلیق معمالر طفیلی چیگره‌ده‌گی کوپلب معمالر حل ایتیلگن، ایران رسميلری ایسه اوّلگی بعضی معمالر برطرف ایتیلگنی و همکارلیک اوچون زمین حاضرلنگنی طفیلی ایشانچ قازانگن.
ریاست الوزراء سیاسي اورین باسری حرمتلی مولوی عبدالکبیر ایران جمهوریتی نینگ افغانستانگه تورلی ساحه‌لرده کورسه‌ته‌یاتگن یاردمینی یوقاری بهالر ایکن، قوشنی دولتلر بیلن ایجابي علاقه‌لر اسلام امیرلیگی تشقی سیاستی نینگ مهم قِسمی ایکنینی تاکیدله‌دی.
افغانستانده مخدرمادّه‌لر ییتیشتیریش و تجارت صفرگه توشیریلگنی، بو نه‌فقط افغانلر، بلکه بوتون منطقه اوچون منفعت دی دیدی سیاسی اورین باسر.
محترم مولوی عبدالکبیر کابل و تهران اورته‌سیده‌گی ایکّی تامانله‌مه ایجابي مناسبتلرگه اورغو بیریشدن تشقری، اسلام امیرلیگی افغانستانده‌گی مسوول و باشقرووچی نظام صفتیده افغان توپراغیدن اوز قوشنیلریگه و دنیاگه قرشی فایده‌لنیشگه رخصت بیرمسلیگینی توشونتیردی.#
