د اقتصادي کمېسیون په نوبتي غونډه کې چې په مرمرینه ماڼۍ کې جوړه شوې وه، د اطلاعاتو او کلتور وزارت د ملي آرشیف د عوایدو د زیاتوالي پر طرحه؛ د کارګرانو ملي اتحادیې د جایدادونو د برخلیک، د دغه اتحادیې د اساسنامې پر تعدیل او د مدیره هیئت پر ټاکنه؛ د سنايي غزنوي ښارګوټي د پاتې چارو پر پيل او د یوشمېر نورو موضوعاتو د تعقیبي راپورونو په اړه بحثونه وشول.
په غونډه کې چې د ریاستالوزراء اقتصادي مرستیال محترم ملا عبدالغني برادر اخوند په مشرۍ جوړه شوې وه، تر هراړخیز بحث وروسته د اطلاعاتو او کلتور وزارت د ملي آرشیف د عوایدو د زیاتوالي طرحه د اقتصادي کمېسیون د نظرونو او د دغه کمېسیون د تخنیکي کمېټې له لوري د راغلو تعدیلاتو په نظر کې نیولو سره تایید او یاد وزارت ته سپارښتنه وشوه، څو ملي آرشیف ته د خلکو د راجلبولو په موخه په اعلاناتو او تشویقي پروګرامونو او همدارنګه لیدونکو او متقاضیانو ته د خدمتونو په وړاندې کولو کې جدي کار وکړي.
همدارنګه د اقتصادي معاونیت د استازي په مشرۍ ټاکل شوې کمېټې ته دنده وسپارل شوه، چې د شته حکمونو او فرمانونو په رڼا کې دې د کارګرانې ملي اتحادیې اساسنامه تعدیل، د جواز ستونزه یې حل او په اساسنامه کې دې د جایدادونو برخلیک روښانه کړي او خپل راپور دې په ټاکل شوې نېټه اقتصادي کمېسیون ته وړاندې کړي.
همداراز د اقتصادي معاونیت د استازي په مشرۍ د اړوندو وزارتونو له استازو څخه ټاکل شوې کمېټې ته دنده وسپارل شوه، چې د خصوصي شرکتونو د وړاندیزونو په ګډون د سنايي غزنوي ښارګوټي ټول تخنیکي اړخونه په هراړخیزه توګه وڅېړي او خپل راپور دې په ټاکل شوې نېټه اقتصادي کمېسیون ته وړاندې کړي.
د غونډې په پای کې د یوشمېر تعقیبي موضوعاتو راپورونه هم وړاندې شول، چې د اقتصادي کمېسیون له لوري تایید او اړوندو وزارتونو او ادارو ته یې د تطبیق سپارښتنه وشوه.
