د افغانستان اسلامي امارت د رياست الوزراء اداري مرستيال محترم مولوي عبدالسلام حنفي نن ماسپښين د افغانستان لپاره د متحده عربي اماراتو ځانګړي استازي محترم سيف محمد خلفان سره وکتل.
په دې کتنه کې لومړی د افغانستان لپاره د متحده عربي اماراتو ځانګړي استازي محترم سيف محمد خلفان په مختلفو برخو کې د دواړو هېوادونو تر منځ د نېکو اړيکو يادونه وکړه او وې ويل، دا اړيکي د افغانستان او متحده عربي اماراتو تر منځ د دوستۍ نښه ده.
نوموړي همداراز د سوداګريزو اړيکو د پراختيا او د دواړو هېوادونو تر منځ د پانګونې جلب ته اشاره وکړه او زیاته يې کړه، هيواد يې د دغو اړيکو د پراختيا او پياوړتيا غوښتونکی دی.
د متحده عربي اماراتو ځانګړي استازي له ګاونډيو هيوادونو څخه له اخراج کېدونکو افغان کډوالو سره د همکاريو زياتېدو خبر ورکړ.
د رياست الوزراء اداري مرستيال محترم مولوي عبدالسلام حنفي د افغانستان لپاره د متحده عربي اماراتو ځانګړي استازي سيف محمد خلفان ته د ښه راغلاست تر څنګ زياته کړه، متحده عربي امارات له ډېرو کلونو راهيسې له افغانستان سره د يو ښه دوست په توګه سوداګریزې، اقتصادي او سياسي اړيکي لري او موږ هيله لرو، چې په مختلفو برخو کې د دواړو هېوادونو تر منځ اړيکې لا زياتې پراخې او پياوړې شي.#
