د افغانستان اسلامي امارت د ریاست الوزراء سیاسي مرستیال محترم مولوي عبدالکبیر نن په سپېدار ماڼۍ کې د میدان وردګ ولایت یو شمېر علماوو، قومي مشرانو او مخورو سره ولیدل.
په دې کتنه کې، راغلو علماوو او قومي مشرانو د میدان وردګو ولایت د امنيتي او ټولنيز وضعيت په اړه د ریاست الوزراء سیاسي مرستیال ته معلومات ورکړل او زیاته یې کړه، د دې ولایت ولسونو هماغسې چې د اسلامي نظام د ټينګښت لپاره نه ستړې کېدونکې مبارزه وکړه، اوس هم د اسلامي نظام د ثبات او ساتنې لپاره همکارۍ او قربانۍ ته چمتو دي.
دوی وویل، ولسونه د اسلامي امارت ملاتړ خپل مسؤليت بولي او هیڅکله به د پردیو د لمسون او تبلیغاتو ښکار نشي.
راغلو علماوو او قومي مشرانو د دې ولایت یو شمېر ستونزې او وړاندیزونه هم د ریاست الوزراء سیاسي مرستیال سره شریک کړل.
د ریاست الوزراء سیاسي مرستیال محترم مولوي عبدالکبیر راغلو علماوو او قومي مشرانو څخه مننه وکړه او د میدان وردګ ولایت د خلکو زيار او مبارزې ته په اشارې يې وويل، د اسلامي نظام د ټينګښت لپاره ټولو افغانانو قرباني ورکړي او اسلامي نظام د ټولو شريک کور دی.
نوموړي د ميدان وردګو ولايت دغو علماوو او قومي مشرانو ته ډاډ ورکړ، چې ستونزې به يې له اړوندو ادارو سره شریکې شي.#
