محمد اشرف غنی رئیسجمهوری اسلامی افغانستان که در راس یک هیات بلند رتبۀ دولتی بهمنظور اشتراک در دومین نشست سران کشورهای "پروژه کاسا یک هزار" عازم تاجیکستان گردیده بود، صبح امروز وارد دوشنبه پایتخت آنکشور گردید.
رئیس جمهورغنی هنگام عزیمت بهتاجیکستان در میدان هوایی بین المللی دوشنبه، مورد استقبال دولت علی سعید معاون اول صدراعظم، نظام الدین زاهدی معاون اول وزارت امور خارجه، زوئیدزاده معاون شاروال دوشنبه و خسرو غایباوف رئیس اداره آسیا- افریقای وزارت خارجه تاجیکستان و همچنان سفیر و شماری از اعضای سفارت افغانستان در دوشنبه، قرار گرفت.
سپس رئیسجمهور و هیات همراهاش رهسپار درۀ ورزاب محل برگزاری نشست کشورهای پروژه کاسا یک هزار گردید و در آنجا یکجا با صدراعظم پاکستان و صدراعظم قرغیزستان مورد استقبال امام علی رحمان رئیسجمهور تاجیکستان قرار گرفت.
قرار است رئیسجمهور در این نشست سخنرانی نموده، دیدگاه افغانستان را در رابطه به همکاریهای منطقوی و اهمیت افغانستان به عنوان چهارراه اتصال منطقوی، بخصوص در زمینه انتقال انرژی برق از تاجیکستان و قرغیزستان به پاکستان، بیان نماید.
