افغانستان اسلام امیرلیگی ریاست الوزراء اداری اورین باسری مولوی عبدالسلام حنفی جنابلری، سرپل ولایتیگه بولگن سفری دوامیده، اوتگن کونی توشدن کیین، اوشبو ولایت حاکمی و بیر قطار محلی مسئوللر بیرگه لیگیده سرپل بیلیم یورتینی باریب کوردی و اوشبو بیلیم یورتده اوتکزیلگن ییغینده نطق سوزلهدی.
مولوی عبدالسلام حنفی جنابلری، مذکور بیلیم یورت مسئوللریدن منتدارلیک بیلدیریب، شوندهی دیدی: «اسلامی نظامنی قوریش اوچون، حق و باطل آرهسیده کمیده یریم عصر کورهش دوام ایتدی. سابق شوروینینگ افغانستاننی اشغال قیلگن دوریده، خلقنینگ برچه قتلملری، جملهدن عالملر، بیلیم یورت استادلری و باشقه خلق بو کورهشده حصه قوشدیلر. افغانستان خلقینینگ برحق کورهشلری و قربانلیکلری نتیجهسیده، اشغالچی کوچلر افغانستاندن هیدهلدی.»
ریاست الوزراء اداری اورین باسری، غلبهدن کیین افغانستان مسلمان و مجاهد خلقینینگ اوشه پیتدهگی مسئوللری اوز ارا کیلیشه آلمهگنلیکلرینی و اولرنینگ کیلیشماوچیلیکلری همده قدرت طلبلیکلری نتیجهسیده، مملکت ویران بولیب، ایچکی اوروشلرگه کیریب قالگنینی ایتدی.
مولوی عبدالسلام حنفینینگ قوشیمچه قیلیشیچه، اوشه دورده بیر قطار حقیقی مجاهدلر ملا محمد عمر مجاهد (رح) رهبرلیگیده ایچکی یاندیرووچی اوروشلرگه چیک قوییش و مملکت خوفسیزلیگینی تأمینلش اوچون ایاققه توردیلر و قیسقه وقت ایچیده مملکتنینگ کوپلب قسملرینی قوراللی گروهلردن تازهلهدیلر و نتیجهده امنیت تأمینلندی، ملوکالطوایفیلیک یوق قیلیندی و فسادنینگ تامیری قورتیلدی.
ریاست الوزراء اداری اورین باسری آرتیقچه قیلیب، اوندن کیین غربی کوچلر تورلی بهانهلر بیلن مملکتنی اشغال قیلگنینی و بو دورده هم اسلام امیرلیگی مجاهدلری اوز کورهشلرینی دوام ایتتیرگنینی تأکیدلهدی. او، کوپلب عالملر قرآن قاریلری، محصللر و مجاهدلر مملکت آزادلیگی یولیده شهید بولگنلیکلرینی، ایریم کیشیلرنینگ ایسه گوانتانامو کبی قماقخانهلرده قملنگنینی و افغانستان خلقیگه قرشی کوپلب جنایتلر آلیب باریلگنینی ایتدی.
شونینگدیک مولوی عبدالسلام حنفی جنابلری، افغانستان خلقی و اسلام امیرلیگی مجاهدلرینینگ قربانلیکلری نتیجهسیده مملکت اشغالچیلر وجودیدن آزاد بولدی و اسلامی نظام حاکم بولگنی بویوک بیر نعمت ایکنینی اورغولهدی.
ریاست الوزراء اداری اورین باسری، حاضرگی وقتده مملکتده خوفسیزلیک و تینچلیک حاکم ایکنینی، امیرالمؤمنین (حفظه الله تعالی) تامانیدن عمومی عفو اعلان قیلینگنینی و مملکتنینگ برچه نقطهلریده تورلی ترماقلرده کته رواجلنیش پروژهلری عملگه آشیریلهیاتگنینی تیلگه آلدی.
انهشو حالده مولوی عبدالسلام حنفی جنابلری، تعلیم-تربیه و تحصیلنینگ اهمیتینی آچیقلب، بیلیم یورتلردهگی زراعت، کمپیوتر ساینس و انجنیرلیک کبی عملی فاکولتهلر ایلغار علمی خذمتلر تقدیم ایتیشلری کیرهکلیگینی اورغولهدی.
او شونینگدیک، استادلر و محصللرنینگ ظرفیتینی آشیریشنی مهم بیلیب، بو حقده جدی اعتبار بیریلیشینی سورهدی.
ریاست الوزراء اداری اورین باسری محصللرگه قرهته: «بو وطننینگ کیلهجگینی قورووچیلر اوزلرینگیز سیزلر، آبادانچیلیک و ترقّیاتنی اجنبیلردن کوتمسلیگینگیز کیرهک، بلکه مملکتنی اوزینگیز قوریشینگیز ضرور»، دیدی.
مولوی عبدالسلام حنفی، اسلام امیرلیگی محصللر اوچون یخشیراق امکانیتلر و تجربهلی استادلرنی تیارلب بیریشگه حرکت قیلهیاتگنینی، طلبهلرنی یخشیراق تعلیم آلیب، تخصص ایگهسی بولیشلری کیرهکلیگی حقیده توختهلیب اوتدی.
او شونینگدیک، اسلام امیرلیگیده تعصب و منطقه-بازلیککه جای یوق، هر قندهی کیشی بو مسالهلرگه قول اورسه، اسلام امیرلیگینینگ قرشیلریدن سنلهدی دیب، سوزینینگ سونگیده، برچه خلقلر اورته سیده بیرلیک و اوز ارا حرمت بولیشی ضرورلیگینی تأکیدله دی.#
