افغانستان اسلام امیرلیگی اداری اورینباسری حرمتلی مولوی عبدالسلام حنفی بوگون یکشنبه توشدن آلدین اوزبیکستان جمهوریتی عامه ساغلیق وزیرلیگینینگ دارو واسطهلری باشقرمهسی مسوولی عبدالله عزیزاف و او کیشی بیلن بیرگه تشریف بویورگن هییت بیلن اوچرهشدی.
شونینگدیک اوچرهشووده افغانستان عامه ساغلیق وزیرلیگینینگ دارو واسطهلری و آزیق- آوقت بوییچه اورینباسری مولوی حمدالله زاهد هم اشتراک ایتگن ایدی. عبدالله عزیزاف اوزبیکستانلیک سوداگرلر افغانستانده دارو واسطهلرینی کیلتیریش و ترقهتیش ساحهسیگه سرمایه کیریتیشگه تیار ایکنلیکلرینی بیلدیردی.
اونینگ ایتیشیچه، بیر قطار اوزبیکستانلیک تدبیرکارلر الّهقچان افغانستانگه کیلگن و مملکتده سرمایه یاتقزیش همده دارو تأمیناتی بیلن باغلیق معمالرنی حل ایتیش مسألهلرینی محاکمه قیلیشنی ریجهلشتیرماقده.
عبدالله عزیزافنینگ تأکیدلشیچه، صفتلی دارو واسطهلرینی کیلتیریش و ترقهتیش همده اهالینینگ ایشانچینی قازانیش اوستوار وظیفه حسابلنهدی. شونینگدیک، اولر اوز مملکتلریده ایشلهتیلهدیگن دارو واسطهلرینی عیناً شو صفتده افغانستانگه ییتکزیب بیریشگه وعده بیردی.
عینی حالده او، لابراتوار جهازلرینی تأمینلش و لابراتوار خادملرینینگ ملَکهسینی آشیریش یونهلیشیده هم همکارلیک قیلیشگه تیار ایکنلیکلرینی بیلدیردی.
حرمتلی مولوی عبدالسلام حنفی اوز نوبتیده مهمانلرنی صمیمي کوتیب آلیب، اولرنینگ دارو ساحهسیدهگی سرمایه یاتقزیشلرینی خوش قرشیلب، بو ایشلرنی اوزبیکستان تامانیدن بجریلیشی ایکّی دولت اورتهسیدهگی همکارلیکنی مستحکملش یولیدهگی مهم قدم دیب بهالهدی.
اونینگ تأکیدلشیچه، افغانستان اسلام امیرلیگی مملکت ایچیدهگی برچه سرمایه یاتقزیشلرنی قۉللب- قوّتلهیدی و تاجرلر اوچون برچه ضرور شرایطلرنی یرهتهدی.
شونینگدیک، او صفتلی دارو واسطهلرینی کیلتیریش مهملیگینی قید ایتیب، افغانستان و اوزبیکستان اورتهسیدهگی مناسبتلر اینگ یخشی درجهده ایکنینی، اینیقسه سودا- ساتیق ساحهلرده بو علاقهلرنی ینهده کینگهیتیریش اوچون علاقه مند ایکنلیکلرینی معلوم قیلدی.#
