افغانستان اسلام امیرلیگی ریاست الوزراء اداری اورین باسری حرمتلی مولوی عبدالسلام حنفی بوگون توشدن آلدین جاپان ساساکاوای تینچلیک بنیادی هیاتی مسوولی تدامیچی یاماموتوی جنابلری، بنیادنینگ اجرائیه باشلیغی اتسو اداچی جنابلری، بو مملکت نینگ افغانستان ده گی ایلچیسی تاکایوشی کورومیا و یولداش هیاتی بیلن اوچره شیب ملاقات قیلدی.
اوشبو اوچره شووده دستلب ساساکاوا تینچلیک بنیادینی هیاتی رهبرلیک قیلگن تدامیچی یاماموتو جنابلری صحبت قیلیب اسلام امیرلیگی نینگ افغانستانده تورلی بولیملرده قولگه کیریتگن یوتوقلرینی تیلگه آلدی.
اونینگ سوزلریگه کوره، جاپان افغانستان بیلن علاقه لرینی تورلی بولیملر جمله دن تجارتی واقتصادی ساحه لرده دوام بیریب اونی کینگه یتیریش اوچون تلاش قیله دی.
شونینگدیک تدامیچی یاماموتو جاپان نینگ افغانستان خلقی گه کورسته جک یاردملری دوامی بولگنیدن ایشانچ بیریب ایتیشیچه، مملکت تورلی بولیملری جمله دن تعلیم و تربیه و ساغلیقنی سقلش ده افغانستان مردمیگه دوام بیره دی و افغانستان اسلام امیرلیگی نینگ مسووللریدن بو توغریده همکارلیک ایسته دی.
کیینچه لیک ریاست الوزراء اداری اورین باسری حرمتلی مولوی عبدالسلام حنفی جاپان ساساکاوای تینچلیک بنیادی هیاتینی خوش کیلیب سیزلر دیب، بو مملکت نینگ افغانستان مردمیگه کورسه تیب کیلگن انسان پرورلیک یاردملریدن قدردانلیک قیلدی.
ریاست الوزراء اداری اورین باسری افغانستان و جاپان نینگ دوستانه علاقه سی نی تیلگه آلیب ایتیشیچه، افغانستان اسلام امیرلیگی بو علاقه لر کینگه یب و یخشی بولیشی اوچون تلاش قیله دی.
حرمتلی مولوی عبدالسلام حنفی جنابلری نینگ سوزلریگه کوره، بو مملکت ده رواجله نیش بولیملرده داکتر ناکامورا آرقلی ایریم ایشلر عملگه آشیریلگن و افغانستان ملتی اونی ایزگولیک ده ایسله یدی بو ایسه هر ایکی مملکت علاقه لری چوقورلیگینی کورسته دی.
شونینگدیک ریاست الوزراء اداری اورین باسری بو افغانستانده ایریم بولیملر اینیقسه کانلرنی قازیب چیقاریش، ایکینچلیکنی رواجلنتیریش، ساغلیقنی سقلش، تکنالوژی معلوماتی و تعلیم و تربیه سرمایه یاتقیزیش فرصتلرنی تیلگه آۀیب جاپان نینگ تاجرلری همده سرمایه یاتقیزوچیلریدن بو خصوصیده سرمایه کیریتیشلرینی ایسته دی.
عین حالده حرمتلی مولوی عبدالسلام حنفی نینگ قوشیمچه قیلیشیچه، افغانستان اسلام امیرلیگی دنیانینگ بوتون مملکتلری جمله دن جاپان بیلن متقابل حرمت و تعامل اساسیده ایزگو علاقه ده بوریشنی خواهله یدی.#