ریاست الوزراء اداری اورین باسری حرمتلی مولوی عبدالسلام حنفی بوگون توشدن آلدین عالملر، قوم بویوکلری، استادلر و اوقووچیلر اشتراکیده جوزجان بیلیم یورتیده تشکیل ایتیلگن ییغینده قتنشیب، نطق سوزلهدی.
ریاست الوزراء اداری اورین باسری دستلب جوزجان بیلیم یورتی مسئوللری و استادلری نینگ قیلگن ایشلری و فعالیتلریدن منتدارلیک بیلدیریب، عالملر و استادلرگه قرهتیب شوندهی دیدی: «سیزلر مملکت فرزندلرینی توغری تعلیم بیریش، تربیه قیلیش و فکرلرینی روشن قیلیش یولیده کیچه-کوندوز محنت قیلهیاتگن کیشیلرسیزلر، شونینگ اوچون بیز سیزلرنینگ برچهنگیزنی اوز فخریمیز دیب بیلهمیز.»
او، افغانستاننینگ حاضرگی وقتده اوروش باسقیچیدن اوتگنینی و ترقیات همده آبادانچیلیککه ضرورتی بارلیگینی ایتیب، بو مقصدگه ییتیشیش علم، تخصص و توختاویسیز حرکت بیلن عملگه آشیریلیشینی ایتدی.
حنفی جنابلری، جوزجان بیلیم یورتینی مملکت نینگ ییتکچی بیلیم یورتلریدن بیری دیب اتهدی و استادلردن یاشلرنی تعلیم-تربیه قیلیش یولیده آلدیندهگیدن هم کوپراق سعی-حرکت قیلیشلرینی سورهب: «ایشانچ بیرهمنکه، اسلام امیرلیگی سیزلرنی قوللب-قوتلشیده هیچ قندهی کوتاهلیک قیلمهیدی»، دیدی.
اونینگ قوشیمچه قیلیشیچه، اوتمیش ییللر دوامیده جوزجان ولایتی نینگ آبادانچیلیگیگه ییترلیچه اعتبار بیریلمهگن، بیراق اسلام امیرلیگی تورلی ترماقلرده رواجلنیش پروگراملرینی قولگه آلیب، اوشبو ولایتده قوریلیش ایشلرینی باشلهگن. درزاب و قوشتیپه تومنی یوللرینی قوریش و آقچه تومنیگه برق اوتکزیش اوشبو جملهدن دیر و درزاب بیلن قوشتیپهگه هم یقین کیلهجکده برق ییتکزیب بیریش ایشلری باشلنهدی.
مولوی عبدالسلام حنفی جنابلری شونینگدیک، فاریاب-هرات شاه یولی، میمنه-گرزیوان و بلچراغ عمومی یولینینگ عملی ایشلری دوام ایتهیاتگنی، دره آغزی سوو توغانینینگ قوریلیشی باشلنگنی و سرپل-فاریاب یولینینگ ایشی هم تیزده باشلهنیشینی معلوم قیلدی.
او، حاضرگی وقتده جوزجان ولایتی کسلخانهسینینگ ایشی تمام لنگنینی و مقصدیمیز مملکت بویلب هیچ قندهی قیشلاق، مکتب و مدرسهسیز قالمسلیگی همده اوزاق حدودلرده صحی کلینیکلر ایجاد ایتیلیشی ضرورلیگینی اورغولهدی.
شونینگدیک، ایکینچیلیکو تخنیکی-مسلکی تعلیمات انستیتوتلریده مسلکی بولیملرنی کوپهیتیریش کورهشیده ایکنلیکلرینی بیان ایتدی.
ریاست الوزراء اداری اورین باسری جوزجان و سرپل ولایتلریدهگی ایچیملیک سوو تنقیسلیگیگه اشاره قیلیب، سلطان ابراهیم توغانینینگ بیتیشی و قوشتیپه کته کانالیدن شبرغان شهریگه بیر فرعی کانالنینگ اولنیشی بیلن، بو ایکی ولایتدهگی قینچیلیکلرنینگ برطرف ایتیلیشینی ایتدی.
مولوی عبدالسلام حنفی جنابلری، جوزجان بیلیم یورتی محصللری بیلن بولگن ایری اوچرهشوویده اولرگه خطاب قیلیب شوندهی دیدی: «مملکت نینگ کیلهجگی سیزلرنینگ زحمتکش قوللرینگیزده دیر. سیزلرگه بیریلگن بو آلتین وقتلردن توغری فایدهلنیب، علم و تعلیم اورگنیش یولیده کوپراق سعی-حرکت قیلیشینگیز کیرهک، مملکت آبادانچیلیگی سیزلرنینگ محنتلرینگیز بیلن میسر بوله دی.».#
