د افغانستان اسلامي امارت د ریاست الوزراء اداري مرستیال محترم مولوي عبدالسلام حنفي نن له غرمې مخکې د فاریاب ولایت د ګرزیوان او بلچراغ ولسوالیو له یو شمېر مخورو او سپین ږیرو سره وکتل.
په پیل کې یادو مخورو او سپین ږیرو د ګرزیوان او بلچراغ ولسوالیو د اجتماعي او امنیتي وضعیت په اړه د ریاست الوزراء اداري مرستیال ته معلومات ورکړل او په یادو ولسوالیو کې یې د امنیت د ټینګښت او د خلکو د ستونزو د حل په اړه د مجاهدینو او سیمه ییزو مسؤلینو له کړنو څخه رضایت څرګند کړ.
دوی په یادو ولسوالیو کې د معیاري سړکونو او روغتیایي کلینیکونو د جوړولو په ګډون د مخابراتو او برېښنا ستونزې د ولسونو اساسي اړتیا وبلله او د دوی غوښتنې یې د اسلامي امارت له مسؤلینو سره شریکې کړې.
د ریاست الوزراء اداري مرستیال محترم مولوي عبدالسلام حنفي راغلو مشرانو ته د ښه راغلاست ترڅنګ وویل، په هره ټولنه کې د انکشاف او پراختیا لپاره امنیت اساسي شرط دی چې په الهي فضل د اسلامي امارت په واکمنېدو سره په هیواد کې تأمین شوی او هیوادوال په پوره ډاډ سره خپلو ورځنیو چارو ته دوام ورکوي.
د ریاست الوزراء اداري مرستیال د دوی د وړاندیزونو په اړه وویل، د اسلامي امارت مسؤلینو خپلو امکاناتو ته په پام لازم اقدامات کړي او د دې ستونزو د حل لپاره به هم خپله ټوله هڅه وکړي.#
