د افغانستان اسلامي امارت د ریاست الوزراء مقام د دفتر لوی رئیس محترم ډاکټر ملا عبدالواسع نن ماسپښین د سره صلیب نړیوالې کمېټې (ICRC) د افغانستان څانګې له مشرې اغلې کاتارینا ریټز، د یادې کمېټې عملیاتي مرستیال ښاغلي سکاټ دوسیټ او د مشرتابه د سیاسي چارو سلاکار ښاغلي عزت ګل سره وکتل.
په دغه کتنه کې چې په ارګ کې وشوه، په پیل کې اغلې کاتارینا ریټز په افغانستان کې د دوی د دوامدارې مرستې او کاري ملاتړ په موخه د اسلامي امارت قدرداني وکړه.
د سره صلیب نړیوالې کمېټې (ICRC) د افغانستان څانګې مشرې څرګنده کړه، دغه کمېټه په افغانستان کې د روغتیایي خدماتو وړاندې کولو، له معلولینو او معیوبینو، برېښنا او اوبو رسولو سکتور او سرې میاشتې ادارې سره د مرستې، زندانیانو ته د خدماتو رسولو، میندو ته د روغتیایي تعلیماتو او خوارځواکۍ په راکمولو کې د نغدي او غېر نغدي مرستو وېشلو برنامې مخته وړي چې د تېرو کلونو په پرتله یې په افغانستان کې پراختیا پیدا کړې ده.
اغلې کاتارینا ریټز، بندیانو ته د لاسرسي په برخه کې د اسلامي امارت مسؤلینو د همکارۍ او د بندیانو په اړه له دوی سره د شوې تفاهمنامې قدراني وکړه وې ویل، اوسمهال یې د زندانونو چارو د تنظیم کارکوونکو ظرفیت لوړولو برنامې له لارې زیاتې اسانتیاوې برابرې کړي دي. نوموړې دغه راز د ښه مدیریت په اړه د زندانونو تنظیم له رهبري څخه هم خپله خوښي څرګنده کړه.
وروسته د افغانستان اسلامي امارت د ریاست الوزراء مقام د دفتر لوی رئیس محترم ډاکټر ملا عبدالواسع دوی ته د ښه راغلاست پر مهال وویل، د سره صلیب نړیواله کمېټه له پخوا څخه په افغانستان کې فعالیت لري، موږ تل د یادې کمېټې په ګډون د ټولو خیریه بنسټونو د کړنو او خدمتونو قدردانی کوو او په دې برخه کې د لازیاتې همکارۍ ډاډ درکوو.
محترم ډاکټر ملا عبدالواسع زیاته کړه، ستاسو کړنې عامالمنفعه دي او د کړنو او فعالیتونو څخه مو د افغانستان وګړي برخمن دي له همدې کبله د هر اړخیزې همکارۍ او اسانتیاوو برابرولو لپاره هڅې کوو. هیله ده ټول خیریه بنسټونه په خپلو خیریه چارو کې هغو خدماتو ته لومړیتوب ورکړي چې د اوسني وخت اړتیا وي او د خلکو رښتینو ستونزو ته پکې لاسرسی شوی وي.
د افغانستان اسلامي امارت د ریاست الوزراء مقام د دفتر لوی رئیس وویل، دا چې د اوس لپاره اسلامي امارت د معتادینو راټولو، مهاجرینو او داخلي بې ځایه شویو او سېلاب ځپلو سره د لاسرسي لپاره برنامي مخته وړي، نو پرهمدې بنسټ له ټولو خیریه بنسټونو د همکارۍ غوښتنه کوو.
محترم ډاکټر ملا عبدالواسع له ټولو خیریه بنسټونو هیله څرګنده کړه چې د خپلې کاري ساحې په چوکاټ کې کار وکړي؛ دغه راز دې هڅه وشي چې خیریه چارې په سیاستونو پورې ونه تړل شي، موږ ټول باید د خیر په چارو کې بې پرې واوسو.
د ریاست الوزراء مقام د دفتر لوی رئیس د خپلو خبرو په پای کې په افغانستان کې د سره صلیب نړیوالې کمېټې رهبري ته ډاډ ورکړ چې موږ به په خپلو ټولو شته امکاناتو ستاسو د کارونو د ملاتړ ترڅنګ د ستونزو د هواري په موخه کوټلي ګامونه پورته کوو.#
